Leiden – Stad van my geliefde

-          Afrikaans –

Op ‘n dag het ek terug gegaan

Leiden, geliefde stad

Stad van my geliefde

Warm jas, hande in my sakke

Loop ek doelloos,

langsaam

langs kanale, oor bruggies,

deur stegies en winkelstrate

 En ek hoop dat miskien

ek jou êrens

tussen al die mense weer sal sien

In my gedagte

die herinneringe tevoorskyn getoor

Ek, laggend agter op jou fiets

Die wind in my hare

My arms om jou lyf

Ek onthou nog die geur

van leer en after-shave

Ek loop verby die Burcht

De Bruine Boon,

daar waar ons eerste afspraak was

Ek proe weer die smaak van

Belgiese bier in de Stadthouder Café

 Van ‘n “broodje haring” op die mark

En ek sien hoe jy liefdevol na my kyk

Nooit het jy geweet hoe lief ek jou het

Ek was trots, ek het ontken,

want jy was my beste vriend,

Al was jy eers verlief op my

Te laat,

te laat het ek jou ook lief gekry

Skielik voel ek so alleen

terwyl dit van mense om my wemel

Slaan my oë op na ‘n bewolkte hemel

Koue reën en trane van verlange

vermeng tot riviertjies oor my wange

En ek vra:

Waarom? Waarom nou?

Ek draai om

om weer huis toe te gaan

Want Leiden, geliefde stad

Stad van my geliefde

Was leeg,

So ontsettend leeg

Sonder jou